أحمد صقر

قابلت في الرياض د عبدالعزيز الطالحي ..طبيب سعودي شاب درس الطب في مصر و بيستثمر معنا في العاصمه الادارية و يحب الفن و الثقافه و الطعام و الناس في مصر .
د عبدالعزيز اشتغل بعد عودته الي السعودية في وحدات صحية نائية القصص اللي حصلتله فيها تصلح يتعمل منها نسخه سعودية من مسلسل العياده وازاي الطب و العلم يقدر يقدم الخدمه متجاوزا تحديات الموروث القبلي والمجتمعي في بلادنا .

د عبدالعزيز استكمل دراسته و بقي استشاري مهم في تخصصه و يعمل الان في واحدة من اكبر مستشفيات العاصمه السعودية الرياض ..لكن المهم انه في السنين الاخيره بقي عضو فريق تحديث منظومة الرعاية الصحية في مكتب وزير الصحة السعودي ..وسمعت منه حكاية توفيق الربيعه دكتور الجامعة السعودي اللي حصل علي دكتواره في علوم الادارة و الحوكمة الرشيده من جامعة امريكية و قصة نجاحه وزيرا للصحه وهو اصلا مش طبيب لكنه دكتور في الاداره و ان بفضل نجاحه في ادارة الازمه في اعوام الكرونا اتعين وزير للحج و العمره واحده مو اهم الوزارات في الحكومة السعودية و انه اول ما راح الوزاره تعامل بمنهج جديد تماما و خيال جددد تمام هو اللي النهارده محول الحرم المكي و المدني الي واحد من اهم روافد ايرادات الحكومه السعودية بعد ما حول الفيزا السعودية من اصعب الفيز الي واحدة من اسهل الفيز في الدخول للبلاد سياحه وعمليا بدل ما شهر رمضان تاريخيا هو ازحم شهر في السنه حول طول السنه الي العشر الاواخر من رمضان و حقق مستهدفات الزائرين اللي مفروض يوصلولها في ٢٠٣٠ خلال اقل من ٣ اعوام منذ توليه المنصب ..شخص واحد لدية رؤية و مساحه من التجريب و الخيال قدر يصنع قصة نجاح بالارقام موثقه في وزارتين مختلفتين مالهمش علاقه مباشره بتخصصه غير انه من أهل الكفاءه والادارة ..

ويمكن دي اكتر شيء لافت في زيارتي ان اجيال كتير سافرت للابتعاث في عهد الملك عبدالله لكن رجوعهم و استفادة بلادهم منهم كانت محدوده لكن اللي بيحصل اخر سنين ان الكفاءات من الاجيال الشابه بقي بيتفتح قدامها مسارات اكبر لعدالة النفاذ للفرص تبرز وتقدم الموهوبين يفيدو بلدهم و يغيرو واقعهم للافضل ..

د عبدالعزيز دعاني مشكورا لزيارة مسقط رأسه في مدينة الطائف اللي عيلته تمتلك مزارع ورود تشتهر بها الطائف و قالي تعالي زورنا يمكن تعجبك و تعمل فيها فندق جميل زي اللي عملته في أسوان و باذن الله اقدر البي الدعوه في زيارات قادمه بحاول افهم فيها التغيرات السريعه اللي بتحصل في بنية الدولة و الاقتصاد و المجتمع و تفاعلاتها العابرة للحدود ..

تحدثنا عن توطين صناعة الاجهزة الطبية في منطقتنا و كان بيتحدث بشغف و جديه عن توفير كل الدعم الفني و المالي و التشريعي لواحدة من شركاتنا الناشئه العامله علي تقليص ال technology gap في علوم صناعة الاجهزة الطبية و شرحلي برامج دعم وتحفيز الصناعة الجديد اللي شغالين عليه لتطوير منظومة الصحة في السعودية .

انا في شغلي ٩ سنين عايش في دبي من ٢٠٠٢ الي ٢٠١١ تعاملت كتير من السوق السعودي بمختلف شرايحه و مستوياته الاجتماعية و التعليمية و اقدر اقول ان قماشة الشباب السعودي اللي تعاملت معهم مؤخرا من جيل د عبد العزيز هي قماشه اكثر انفتاحا علي العالم و مدركة لموقعهم و تحدياتهم و دورهم في لحظة مركبه بيتخلف فيها مجالات حركة و تجريب و محاولة و تعلم من الاخطاء لاني سمعت و شوف في الزيارة عن هذه الاخطاء وازاي المنظومه بتعترف بيها و بتشتغل علي تقويمها وازاي هما جاين من حته بعيد في اهدار و قلة كفاءة استخدام موارد الي منطق جديده بيحاولو فيها رفع كفاءة استخدام الموارد الي ال ستاندرد العالمية المتعارف عليها .

احنا في مصر معندناش ملوك يبعتو الاف المبتعثين للخارج لتحصيل العلوم لكن بشكل اورجانيك منبعه الحاجه ام الاختراع عندنا ١٤ مليون مصري في الخارج لو طلعنا ١٠ الاف فقط كفاءة ادارية منهم تدخل جوه الجسم المتكلس اللي بيدير مواردنا يمكن نشوف العجب و نكتشف ان عمرها ما كانت ازمة فقر موارد لكنها ازمة فقر خيال و قلة كفاءة استخدام هذه الموارد .

كل التوفيق للاجيال الشابه في منطقتنا العربية اللي من حقهم يحلمو و يعافروا علي تحسين ظروف المستقبل اللي هما و ولادهم هايعيشوه و كل اللي مانعينهم من الحلم هايكونو تحت التراب اما تصحبهم الدعوات او اللعنات كل حسب عمله و اثره و ارثه الذي ترك .