أحمد صقر

زميلي طالب الدكتوراه السيد هارا .. الشخصية الأسطورية للطالب الياباني
الجامعه عامله مبنى لطلبة الماجستير والدكتوراه مفتوح 24 ساعه مجهز بكل اللي ممكن تحتاجة في العملية التعليمية.. سكانر برنترز بكل الاحجام بما فيهم الثري دي.. اجهزة تسجيل صوتي.. شاشات ابل 32 بوصة وانتريهات ومكاتب وغرف اجتماع وبحث وبوردات وبروجكترات وميكرسكوبات وحاجات تانيه غريبه انا مش فاهمها… وفي الدور التالت من المبني مكاتب من حقك تروح تحجز مكتب باسمك ويبقي بتاعك بلا مقابل طول التيرم مادمت بيتسجل ليك 50 ساعة مذاكرة في الشهر والا يتسحب منك ويروح لحد تاني.. طلبه الماجستير والدكتوراه بيعدو في الصاله الكبيره اللي فيها حوالي 60 مكتب فاصل بينهم بارتشنز بارتفاع متر ونص.. الطلبه كتير بتجيب سليبنج باج بتاعتها وتنام جمب المكاتب بالليالي الطويله… كبير الاعده دي السيد هارا اللي في الصورة.. الراجل ده معتكف للعلم.. تقريبا بيبات 20 يوم في الشهر في الدور التالت… المطبخ اللي في الدور التالت جايب فيه مطبخ عروسه… واي حاجة انت محتاجها او محتاج تسال في عليها هاتلاقي اجابتها عند هارا… مهما كان مشغول او منهمك في مذاكرته لو سالته ربع سؤال بيسيب اللي في ايده ويجي معاك لحد ما تلاقي اجابتك او تتحل مشكلتك… لما لقي ان السليبنج باج بتاعتي خفيفه راح جايبلي سليبنج باج تقيله من عنده زياده من غير ما اطلب… امبارح راح جايب اكل جمبري وفراخ بانيه كابوريا واعد يطبخ لكل الطلبه اللي كانو موجودين بمناسبه الكريسماس.. مع انه غير مؤمن باي دين.. دايما في الليله او الاتنين اللي باباتهم في الاسبوع هناك نفسي افهم هو بينام امتي.. طول الليل اعد بيذاكر وطول النهار في المحاضرات… الطلبه كلهم بيرجعوله كبير للمكان وهو شخصية مبهرة في التواضع مع انه جامد جدا في تخصصه… لما حس اني محرج علشان بشخر وانا نايم وخايف ازعج حد قالي انا بنام في النور والدوشه وماتشيلش هم ولو حد من اللي هايباتو اشتكي هافتحلك غرفة الاجتماعات نام فيها براحتك… البرنتر مش عارف تشغله تلاقيه جمبك بيصلح ويشغل.. مش عارف تلاقي وصله مشترك للكمبيوتر تلاقيه جمبك بالمشترك والكابل ويوصلهولك… عايز تطبخ عايز ادوات مطبخ عايز عده نوم او مذاكرة هاتلاقيه بيساعد.. بقي اليوم اللي بيروح فيه بيتهم بحس ان الدنيا خربانه ومهددين شكرا هارا علي تقديم نموزج عملي للاجتهاد والتواضع و للقيادة بضرب المثل